Senjski meštar obratio se stanovnicima Senja na završetku “špecijalnog” 363. Mesopusta
SENJ Senjski meštar Danijel Tomljanović Feralić obratio se svim stanovnicima Senja na završetku ovogodišnjeg 363. Mesopusta, koji je, kako je rekao, zaspravlje bil špecijalan, intanto da će kaj takov uć u historiju senjske mesopusne užance. Ni korona ne može uništiti duh i ljubav prema Senju i mesopustu, pa se maškarana tradicija nastavila i ove, po mnogo čemu posebne godine.
– Zaspravlje, priznat ćete, ni bilo lako izdurat sve ve pasane subote, tamo nigdir od 9. siječnja pa do dan danas. Brez bali, redutov, mesopusnog šušura. Ali morali smo se priko noći naućit na no novo, kako kažedu, on line mesopust. Jerbo svake subote smo se maškarali i sve to fata pošta pokaževali na društvenin mrežama, instagramima, fejsbukima i Bog te pitaj na čemen sve ne, opisao je meštar ovogodišnji on line mesopust te dodao kako već skupljaju forcu da na leto naprave pravi karnevalski šušur, ako naj ozgora dopusti.
Pozdravio je meštar i male maškarice iz vrtića i njihove tete, koji nastavljaju tradiciju maškaranja, učenike osnovne škole, a poseban pozdrav uputio je velikim maškarama koje su bile spremne i za ovaj mesopust. Pozdrave je uputio i civilnoj vlasti te im poručio pred lokalne izbore:
– Nastavite kadi smo mi maškarani stali da nebite na izborima u peton misecu pali.
Mesopust finjeva, rekao je meštar, a sad se treba nastaviti boriti kao i do sada s koronom, tim zlom koje nit ne vidiš nit ne čuješ, kako ju je nazvao.
– Cela Lipa naša je bila u karanteni, niš se ne dela. I ča, zamislite vi, celi život te tiradu na posal, nike je i ura budila, a sad je arivalo vrime kad te tiradu da budeš doma, niš ne delaš i još za to dobivaš šolde.
Spomenuo je meštar Feralić i zatvorene škole, odluku o razmaku od dva metra, u najmanju ruku kaj da smo kužni, reće, nošenje maski, odlazak frizerima i brijačima na kraju izolacije za što se trebalo naručivati mjesec dana ranije, malo falit kaj na magnetsku rezonancu, kaže, a djeci će ove godine u svjedodžbi pisati, reće, da su nastavu finili HRT-u 3 ili RTL-u 2.
– Govoridu nan da peremo ruke, kaj da do sad nismo prali, samo odgovorno, al dok mi peremo ruke, oni povrh nas peredu puste solde, rakao je meštar te poručio Senjanima da šparaju solde jerbo ki zna kakovo vrime dolazi.
Osvrnuo se i na nove mjere stožera.
– Donesli su i nove mjere za birtije i to samo kafa za van. Al moguće in padne na pamet i uvededu kaj prvo tarjiset let par-nepar za odlazak u birtiju. Na parni bi se išlo u jedne birtije, na neparne u druge i tako po redu, a oni ćedu sami raspored napravit.
Opisao je i stanje u gradu.
– A u gradu svega i svačega. Potok lipo izgljeda, al vragu za korist. Nikog nema. Niki ne šeće. Svi doma sedidu i dane i misece brojidu. Škver je propal. Zač? Ki bi znal. Moguće je materijala bilo malo pa je zato sve propalo… Svi pensadu samo o tomen kakova će bit sezona, ča napravit, jerbo nas samo sezona more štanjo na noge stavit. Ča bidu stari rekli, ki ne umre, preživit će.
Dotakao se i vlasti u gradu.
– Dobili smo v.d. gradonačelnika. U Gradu je sad sve veselo i u redu i svi na posal brez Normabeli gredu. Svi su puni mota i volje jerbo je sve opušteno, veselije i bolje.
Uskoro će i izbori.
– U peton misecu su lokalni izbori. Puno ih oće vlast. A vlast je slast. Puno će ih ma izbore ić. Skoro svi gredu i nike mrtve zovedu. Jerbo ki je kriv da kod nas i kad umreš, ima nade da si živ, al samo za izbore. I ki zna kako će sve to finit. Na ultimu ćemo vidit, rekao je senjski meštar te proglasio mesopusta krivim za sve što se protekle godine dogodilo u gradu.
– Kriv je ča je palo vo ludilo od korone ča nas je čapalo, ča nan je grad jopeta raskopan, a pripovida se da u magistratu ni više soldi s kiman će se počepit sve škulje, ča je skela na sud postavna, a nema radnikov, zato ča ni ki stanujedu u Mundaričevcu moradu priko Vrataruše ić doma, ča u Senju ima više topi nego u pustinjskoj oluji, ča je bivši gradonačelnik priko noći moral partit u Zagreb i tamo su ga lipo dočekali, zato ča se del senjskog HDZ-a veseli nečemen ča se zove Lipo, ča se dva senjska državna tajnika lipo slažedu u Zagrebu i sad s puno volje i dunsta deladu za Senj, ča senjski HDZ nije bil nikada jedinstveniji, ča obnašatelj dužnosti gradonačelnika, kad je arival na delo, je našal punu kasu, ma ne soldi neg računi. Ča je Špika vaik još u velikon šoku zbog odlaska djelatnikov u prezasluženu mirovinu, zato ča “Bonaca” mora održavat probe on line, ča obnašatelj dužnosti gradonačelnika tetama u vrtiću ni podigal koeficijente za plaću, ča su posičeni armulini u vrtlu kod prof. Pađena, tako da su Senjani u Zagrebu jako, jako žalosni, zato ča gospa Branka i Špika i dan danas ne pripovidadu, a komediju je napravilo kazalište, ča nijedna korona ne more Ćiru zaštopat doma, ča Feralić više ne piva u “Bonaci”, ča Danka i Jele pasano leto nisu popile zajedno ni jednu kafu, zato ča je Senj jedini grad uz more ki ima dvi ribarnice, a nema ribe, ča ni bilo Šušura pa Špika ni mogal mukte poist i popit, ča je Ineska počela pisat poeziju pa su se “Rožice” raspale, a taman su naučile korake i donio presudu vješanja mesopustu.
– Tako smo se sada svi rešili jednog čovika ki je i ni bil kriv, a najveća krivica mu je ča je bil živ, zaključio je meštar Feralić uz želju da živi vječno Senjski mesopust.