Najavio je meštar Feralić i najnoviji broj Metle i škavacere
SENJ Meštar senjskog mesopusta Danijel Tomljanović Feralić javio se svojon besedon svima onima koji vole i njeguju maškarano ludovanje u gradu pod Nehajem.
“Dragi moj puče senjski, lipi moji Bunjevci, Podgorci, najdraži školani i senjska mularijo, najlipše senjske maškarice, jednon besedon svi vi ki volite vu domaću maškaranu užancu.
Teplo vas pozdravlja vaš meštar. Pa ča ste zaspravlje mislili da od mene vog leta neće bit ni duha? Ooo, kako da ne. Ja, vaš meštar, san se svojon besedon zaklel da vas nikad neću ostavit na cidilu, il, ne daj Bože, da ću vas zaboravit. Eto, komen krivo, komen pravo. Prvo dvi nedilje, valje nigdir potlen Tri Kralja, počelo je peto godišnje doba, za neke, kako rečedu, najlipše godišnje doba u letu. A po staroj užanci trebal je bit otprt Mesopust. I to zamislite, 364. po redu. Kad no, roge. Niš. Verovali smo da će moguće vog leta bit bolje, da ćemo se liberat te vražje korone, da ćemo moć trunčić pobenavit i munjasat, uprav nako kako se to more samo u von našen najluđen, ali intanto najlipšen Senju. Svima skupa nan je jako žal, al san ja jopet u isto vrime jako sritan ča sa sviman vamin verujen da nema te korone ka more zatrit užancu. Zato vas već sada teplo pozivljen da se svake subote u vrime mesopusta uz vonj tripic, zelja i kobasic skupljate jedni kod drugih, kod prijatelji ako ih imate, familijov, susedi ako s njima pripovidate i svi zajedno maškarate, zapivate baren nigdir do pol noći. Slikajte se i sve to kalumajte, kadi dugdir nego na Facebook. Za sada nek nan živi online mesopust. Jednon besedon, napunite baterije kako bi opeta bili puni force za doiduća maškarana leta. A vi, a vi to zaspravlje morete. Ako van moguće na vrata nabasadu maškarice sa kakovon muzikon, molin vas pušćajte ih u kuću, nek s vamin malo zapivadu i zatancadu”.
Najavio je meštar Feralić i najnoviji broj Metle i škavacere, humoristično-satiričnog lista, koji izlazi iz tiska na završnicu mesopusta, a tako će biti i ove godine. Pozvao je na pisanje i crtanje za najstariji humoristično-satirični list u Hrvatskoj, koji je prvi put tiskan davne 1875. godine.
– Metla i škavacera će kontra koroni izać i vog leta. Zato vas uredništvo već sada teplo i nefaljeno pozivlje da čagod napišete i narišete za ve naše cajtunge i sve lipo kalumate u naj Metlin kasunić na Potoku. I to najkašnje do dvaisetog veljače. A sad će niki grintavci, kih vajik ima, pitat o čemen pisat. Da o čemen. Pa ki je od mota, a k tomen ima i dunsta, vaik ima dobrog štofa o čemen se more pisat.
Priprema se i maškarani šušur za završnicu mesopusta.
– A da van rečen, moran van to uprav sad, prvo par trenutki ili momenti dobil san teplu informaciju iz Magistrata i Turističke da se na ultimu vog mesopusta, ki je zaspravlje trebal bit, ponovit ću još jedanputa 364., u utorak, na prvog ožujka, planira na Dvorcu napravit jedna lipa pajacada, maškarani šušur, dakako uz sve epidemiološke mjere, kako se to već danas reće, kadi će se uz frite i žmulj vina sudit mesopustu, a predstavit će se i najnoviji broj Metle i škavacere.
Misli meštar na dan kad će korona završiti i vratiti Senjanima njihove užance.
– Dragi moji, s vamin san u svakon momentu. Pensan o danu kad će jopeta vaj grad zakuvat, kad će u kaligu i dimu, uz rašpe i polke pobenavit senjska maškarana duša. Zato, ne dajte se, pasat će i va korona, kako je arivala, tako će i partit. A na ultimu ostajemo samo mi, jedino mi, munjenci ki volimo svaki portun i kantun vog najlipšeg grada i njegovu mesopusnu užancu. Zato već sad molin Boga da ako niš najkašnje se nađemo ovog leta na senjskon letnjen karnevalu. Puno vas voli i teplo pozdravlja vaš meštar Feralić. Ostanite mi zdravo i živo! Mesopust biži ki ča dobije nek drži!